gréng Blogs

Nei engagéiere fir eis Zukunft

Christian Kmiotek - 18 Mars 2019

„Mir gréng sinn déi eenzeg Partei-Neigrënnung vun deene leschte 50 Joer, déi sech duerchsetze konnt, well mir gréng sinn esouwuel kommunal, wéi national, wéi och europäesch fest implantéiert!“ Wéi ech dësen houfrege Saz leschte Summer op eiser 35-Joer-Feier vu mer ginn hunn, konnt ech mer mol net am Dram virstellen, wéi erfollegräich mer véier Méint drop wären.

„Lëtzebuerg wollt méi där gudder grénger Politik“

Am Oktober 2018 konnte mir gréng bei de Chamberwalen eng spektakulär Progressioun a Prozenter an a Sëtz verbuchen. D’ Wielerinnen a Wieler wollten e Weiderféiere vun der blo-rout-grénger Koalitioun. Virun allem awer wollten d’ Leit eng Stäerkung vun de gréngen Iddien, vun der grénger Method a vun de grénge Wäerter. Lëtzebuerg wollt méi där gudder grénger Politik, déi eis éischt Regierungsbedeelegung tëscht 2013 an 2018 ausgezeechent hat.

Mir kruten de 14. Oktober vun de Wielerinnen a Wieler net nëmmen de Kontrakt verlängert, mee mir kruten en erweiderten Optrag fir déi nächst 5 Joer: mir schaffen elo och a Beräicher, wou een eis bis ewell net erwaart hätt, wéi d’ Police an d’ Arméi. All gréng Verantwortlechkeete si wichteg Aufgaben, déi den Alldag vun all Mënsch direkt beréieren a mir schaffen a Beräicher mat besonnesch groussen Erausfuerderungen. Et geet ënner anerem ëm d’ harmonescht Zesummeliewen, eng aner Mobilitéit,  d’ Wunne fir jiddereen, d’ Energiepolitik vun der Zukunft an de kompromësslose Klimaschutz.

„Ech sinn houfreg, datt zu Lëtzebuerg iwwer zéngdausend jonk Mënschen op d’ Strooss gaange sinn, well se déi global Zesummenhäng verstanen hunn, déi vill vun hiren Elteren a Grousseltere leegnen oder verdrängen“

Gréng Kolleginnen a Kollegen,

Dir wësst jo nach, wéivill Leit an deene leschten 3 Jorzéngten iwwer eis gréng Visiounen de Kapp gerëselt a gelaacht hunn? Abee, et sinn der ewell vill, vill manner. E puer sinn der nach iwwereg, an dat sinn déi, déi immens iwwerhieflech oder esouguer aggressiv ginn, wann eng 16-jähreg schwedesch Schülerin hinnen op de Kapp zou seet, datt se versot hunn an datt se amgaang sinn, der nächster Generatioun hir Perspektiven ze ruinéieren.

Ech sinn houfreg, datt gëscht zu Lëtzebuerg wäit iwwer zéngdausend jonk Mënschen op d’ Strooss gaange sinn, well se déi global Zesummenhäng verstanen hunn, déi vill vun hiren Elteren a Grousseltere leegnen oder verdrängen. Et erfëllt mech mat grousser Hoffnung, datt weltwäit Millioune Jonker opstinn a fir eis all – op der Basis vu  wëssenschaftlechen Erkenntnisser – en anere Liewensmodell fuerderen, ee vu globaler Gerechtegkeet, een deen d’ Grenze vun eisem Planéit mat abezitt.

D’ Geschicht wäert et weisen, mee ech sinn iwwerzeegt, datt “Youth for Climate” eise Liewensstil genee esou déifgräifend a positiv verännere wäert, wéi dat virun engem halwe Jorhonnert “Mee 68” gemaach huet.

Kolleginnen a Kollegen,

Déi global Erausfuerderungen an déi europäesch an national Hausaufgaben déi sech doraus erginn, sinn ze packen. Besonnesch, well eis 5 Ministeren, eis 9 Deputéiert an eis – am Moment – eng Europaparlamentarierin dat selwecht Rezept asetzen, mat deem mer an de leschte 5 Joer esou erfollegräich waren: schaffe, schaffen an nach emol schaffen – onopgereegt a kompetent.

Mir Gréng sinn d’ Zukunftspartei zanter 35 Joer! An eis gestalteresch Aarbecht un der Zukunft vu Lëtzebuerg geet och an de nächste 5 Joer mat elo nach méi Réckewand weider. Well mer eist Land gär hunn.

Léiw Kolleginnen a Kollegen,

Fir de 26. Mee ass de Finish vun der 3. Kompetitioun am Waltriathlon 2017, 2018, 2019 ugesat. Elo grad si mer jo scho mat ganz vill Schwong op déi lescht Ligne droite gaangen. An ech fannen et richteg, datt mer och hei – genee wéi bei de Gemengen- a bei de Chamberwalen – vill jonk Kandidatinnen a Kandidaten opgestallt hunn. Schliesslech geet et – och an Europa – ëm hir Zukunft.

„D’ europäesch Eenheet gëtt eis an der globaliséierter Welt eng Stäerkt, déi kee Land eleng, a scho guer net Lëtzebuerg huet“

Ech sinn iwwerzeegt, datt dee ganze politesche Kuddelmuddel ronderëm de BREXIT – a mir wësse jo nach guer net wat fir ee Chaos eventuell nach reell entsteet – ganz ville Leit an Europa d’ Aen opgemaach huet, iwwer d’ Virdeeler vun der Europäescher Unioun. Sécher: d’ EU ass net perfekt, mee wéilt Dir op d’ Virdeeler vum ongehënnerte Reesen an op d’ Einfachheet vum Euro verzichten? Ech net. Net ze vergiessen, datt d’ europäesch Eenheet eis an der globaliséierter Welt eng Stäerkt gëtt, déi kee Land eleng, a scho guer net Lëtzebuerg huet.

„Mir si konsequent pro-europäesch, mee mir stinn a fir en anert Europa, net dat vun de Lobbyisten a Konzerner, mee fir e soziaalt Europa“

Zur Imperfektioun vun der EU gehéiert och, datt déi aktuell Europäesch Kommissioun zevill op neoliberal Rezepter setzt an den Industrie-Lobbyisten nogëtt. Dat erkenne mer zum Beispill wann et ëm d’ Suite vum Dieselskandal geet oder ëm d’ Festleeë vu verbindleche globale Klimaziler. Et ass deemno wichteg, dat d’ Leit sech am Mee en Europaparlament ginn, dat aner Prioritéite setzt.

Mir gréng si konsequent pro-europäesch. Mee mir stinn a fir en anert Europa, net dat vun de Lobbyisten a Konzerner, mee fir e soziaalt Europa dat op d’ Bedierfnisser vun de Mënschen ageet. Dofir engagéiere mir gréng eis op en Neits mat aller Kraaft fir Europa.

Well mer eist Land an Europa gär hunn.

Catégories: gréng Blogs

Firwat ech nawell gär Äre Presi bleiwe wéilt

Christian Kmiotek - 18 Mars 2019

Léif gréng Kolleginnen a Kollegen,

Wann ech mech engagéieren, da mat Leif a Séil a mat vollem Asaz. Dat hunn ech ëmmer esou gehal a maachen et och nach, sief et als Trésorier vun der TheaterFederatioun, als Vizepresident vun der Kulturfabrik oder als President vun der Fondatioun Kannerschlass. Mäi politeschen Engagement ass – genee wéi bei Iech och – déi logesch Fortsetzung vun eisem laangjäregen Engagement an der Zivilgesellschaft.

Ech denken, datt ech an der Kulturszeen an am soziale Secteur nach ka mathëllefen, d’ Saachen a Bewegung ze halen. A genee esou sinn ech iwwerzeegt, datt ech och weiderhin als Äre President vun eiser Partei meng Energie kann asetzen, fir eis Uleie weiderzedreiwen; Uleies a Causen, déi net nëmmen déi vun eise Wielerinnen a Wieler sinn, mee déi vun alle Leit.

Léif Frëndinnen a Frënn, firwat froen ech Iech fir e weidert Mandat? Ech nennen Iech 3 gutt Grënn.

Eischtens emol, well ech an aller Bescheidenheet mengen, datt ech an deene leschte 6 Joer keng schlecht Aarbecht geleescht hunn. Et war sécher net alles perfekt, well do wou gehuwwelt gëtt, do fale Spéin. A wann een en e bësse méi Ongehuwwelte wéi mech huet, da falen ebe méi graff Spéin. Ech entschëllege mech bei deenen, déi et getraff huet. Wéi awer elo am Gesamte meng Aarbecht inhaltlech ze  bewäerten ass, dat musst Dir entscheeden!

Zweetens. Eis Partei ass méi grouss ginn: méi Ministere mat méi Ressorten, méi Deputéiert mat méi Verantwortungsberäicher, a parallel dozou eng méi breet Parteibasis. Dat ass flott a gläichzäiteg och en Challenge. Et ass d’ Aufgab vun de Co-Presidente vun der Partei, fir den Zesummenhalt ze suergen an d’ Kommunikatioun tëscht de verschiddenen Niveauen z’ assuréieren. Mir hunn dat déi lescht 5 Joer während der éischter grénger Regierungsbedeelegung all zesumme ganz gutt hi kritt an eise Walsuccès vum leschten Oktober konnt ënner anerem dorop opbauen.

Déi intern Kommunikatioun tëscht Regierungsmemberen, Chamberfraktioun, Staatsrot, Comité exécutif, jonk gréng, Genderrot, Lokalsektiounen, Bezierker, Regionalen, Aarbechtsgruppen an all eenzele Member ze fërderen, déi Aufgab wëll ech weiderféieren. Doduerch, datt mer elo 5 Leit an der Regierung an 9 Deputéiert mat méi Mataarbechterinnen hunn, riskéiert natiirlech de Clivage tëscht deenen, déi fulltime politesch schaffen an deenen déi hire politeschen Asaz an engem anerwäerts gutt gefëllte 24-Stonnen-Dag mussen ënnerbréngen, méi grouss ze ginn. Ech kennen dee Phenomen aus mengem kulturellen, sozialen a kommunalen Asaz an e mécht mer keng Angscht, well ech weess wéi een deem entgéint wierke kann: andeems an all Richtungen an an alle Konstellatioune intern matenee geschwat, diskutéiert an ausgetosch gëtt.

Eis Partei huet e wonnerbart Instrument heifir: de COP, eise Parteitrot. De Format vum COP erlaabt den Austausch Partei-Fraktioun-Regierung mat allen interesséierte Memberen. Hei kënne mer ongezwongen an an der Déift spezifesch Theme kontrovers an zilorientéiert diskutéieren a beschaffen. Mir hunn de COP intensiv déi lescht 5 Joer op enger Hällewull vun Theme genotzt, bis hin zu Ministere vun enger anerer Parteifuerf, mat deene mir eis koalitiounsintern ausgetosch hunn. Dat huet zum Zesummenhalt vun der 3er-Koalitioun, zur parteiinterner Cohésioun a schlussendlech zu engem positive Bild vun eiser Partei an der Ëffentlechkeet bäigedroen. Mir hunn et nämlech fäerdeg bruecht, och bei komplexen an emotional schwieregen Themen, duerch dee strukturéierten Dialog parteiintern gëeent ze bleiwen. An dowéinst wëll ech de Format COP onbedéngt weider intensiv an der Parteiaarbecht asetzen.

Drëttens. Nom Wahltriathlon deen Enn Mee op en Enn geet, ass et wichteg, eis erëm ëm d’ Parteiliewen ze këmmeren. Endlech erëm an enger Duebelspëtzt mat enger Co-Presidentin funktionéieren ze kënnen, dorops freeën ech mech . Ënner anerem mussen de GT Communes, de grénge Gemengerotsgrupp an de frësch geschafenen Aarbechtsgrupp Santé nei un d’ Rulle kommen.

An déi bescht Virbereedung op d’ Superwaljoer 2023 mat de Gemengewalen am Juni an de Chamberwalen am Oktober ass et, d’ Aarbecht an de Lokalsektiounen ze stäerken. En plus mussen déi vill nei Memberen onbedéngt agebonne ginn. Donieft wëll ech och, dass mer déi Themen, déi eis Grénge wichteg sinn, no vir bréngen. Esou kënne mer zum Beispill duerch ëffentlech Konferenzen eis Iddie weiderbréngen a gläichzäiteg eise grénge Profil an der Ëffentlechkeet schäerfen.

Voilà, ech hunn den Tour gemeet. Ech wëll Iech awer nach en allerlescht Argument ginn, firwat ech nawell gär Äre Presi bleiwe wéilt.

Kolleginnen a Kollegen, Eis Partei ass déi bescht vun der Welt!

Bon, okay, … ech muss elo éierlech zouginn datt ech – am Géigesaz zu aneren – nach keng aner Partei ausprobéiert hunn. Mee wann ech mer den Zoustand vu gewëssen anere Parteien och nëmme vu baussen ukucken, da muss et stëmmen. A well ech eis Partei aus dem Effeff vu banne kennen, wär et fir mech eng Éier, nach emol fir 2 Joer den Optrag ze kréien, dës wonnerbar Partei – zesumme mam Djuna – no bannen ze féieren an no baussen ze representéieren.

Ech hunn iwweregens och e Slogan: Du wëlls en? – Da wiel en!

Catégories: gréng Blogs